دوورگه‌- خانمه‌ هونه‌رمه‌ندی به‌ناوبانگی میسری (ئیلهام شاهین) كه‌ خه‌ڵاتی (مۆرك دور)ی بۆ باشترین ئه‌كته‌ری ساڵی 2010 به‌ده‌ستهێنا، له‌ میانی دیمانه‌یه‌كدا له‌گه‌ڵ كه‌ناڵی (مصر-1) رایگه‌یاند كه‌ ئه‌و به‌وه‌رگرتنی خه‌ڵاتی باشترین ئه‌كته‌ری ساڵی 2010 زۆر خۆشحاڵه‌. هه‌روه‌ها ئیلهام شاهین رایگه‌یاند كه‌ تا دایكی له‌ژیاندا مابوو، كێشه‌ی نه‌بوو، چونكه‌ ئه‌و زۆر ده‌ستڕه‌نگین بووه‌ و خواردنی بۆ ئاماده‌كردووه‌، به‌ڵام ئێستا له‌ زۆربه‌ی ژه‌مه‌كاندا بۆ خواردن روو له‌ چێشتخانه‌كان ده‌كات، چونكه‌ نازانێت هیچ جۆره‌ چێشتێك لێ بنێت. هه‌روه‌ها ئیلهام شاهین گوتی: ته‌نانه‌ت نازانم (چای)یش لێ بنێنم. شایانی باسه‌ به‌هۆی ده‌ركه‌وتنی له‌ چه‌ند فیلمێك به‌ نیمچه‌رووتی و به‌شداریكردنی له‌ چه‌ندین فیلم كه‌ دیمه‌نی ورووژێنه‌ریان تێدابوو، ئیلهام شاهین رووبه‌ڕووی چه‌ندین ره‌خنه‌ی توند بۆوه‌، به‌ڵام ئه‌و وه‌ك خۆی ده‌ڵێ: گوێ له‌م ره‌خنانه‌ ناگرم. جگه‌ له‌مانه‌ش ئیلهام شاهین له‌ دیمانه‌كه‌دا رایگه‌یاند كه‌ ئه‌و له‌به‌رئه‌وه‌ی كه‌ هه‌ستی كردووه‌ ده‌نگی ناخۆشه‌، بۆیه‌ له‌ گۆرانی گوتن دووركه‌وتۆته‌وه‌ و ئاماده‌ نییه‌ به‌هیچ جۆرێك گۆرانی بڵێت.